燒肉食譜

Blog友問我燒肉食譜，有拖冇欠！
其實燒肉有不少做法架，甚至西人都有自己嘅一套。
不過唔理邊一套，work嘅就得啦。
做燒肉首要重點係選擇邊塊肉，一般都係用腩肉，但係腩肉都有不同架。
肥瘦層數多嘅燒肉最唔易鞋，雖然最出名係五花腩，但係其實七層肉比五層肉好食架。
另一樣係肥瘦層，如果一大層肥再一大層瘦果種，會鞋同實啲架。
最好係買薄薄一層肥，再薄薄 一層瘦果種，焗完之後瘦同肥會有融合情況，唔會肉還肉，肥還肥，軟滑好多！

燒肉有分玻璃皮和芝麻皮 ，我地呢個係芝麻皮架。



燒肉食譜



材料﹕ 
豬腩肉1kg
幼鹽 
油1/2茶匙

 
調味: 
五香粉少許
黑胡椒碎1/4湯匙 
糖1/2茶匙
幼鹽1茶匙 
紹興酒1茶匙



豬腩肉印乾水，放在焗盤上，反轉豬腩皮向下，
拌勻所有調味，抹在肉表面及四邊，保持豬腩皮乾爽，
反轉豬腩皮向上，豬腩皮不用抹調味，
小心鋪一層幼鹽於豬腩皮上，直至白色幼鹽完全蓋住豬腩皮，入雪櫃等隔夜，
取出，用餐刀小心刮去所有幼鹽(否則會勁咸！)，在豬腩皮上抹油，
200度上層焗30-40分鐘(視乎豬腩肉厚薄)，豬腩皮會逐漸爆花(即係出芝麻皮)，
如肉熟後，豬腩皮表面還未完全爆花，改用上火焗至豬腩皮完全爆花。