芫荽芝士千層餅

繼續食芫荽，今次連啲根都食埋，芫荽根香氣比葉更好，而且聽講好有益添。
另外，仲有芝士要清，我家唔常買芝士，每次買咗，都食得好慢。
是日，要將呢兩樣唔啦更嘅嘢，放埋一齊。

我要整千層餅呀。
前一晚，300g麵粉，加少少酵母，一杯水，拌勻，蓋上蓋，入雪櫃。
第二日，變咗咁。。。。

大盤內加入350g麵粉，1湯匙糖，1／2茶匙鹽，拌勻，加入上面嘅老麵，搓一陣之後開始慢慢加入暖水，直至成麵糰。
老麵好黐立立，所以通常唔使落咁多水。
另外準備4湯匙油，1茶匙花椒粉，1／2茶匙鹽，將花椒粉同鹽拌勻，成為花椒鹽。

工作枱上灑上麵粉，將麵糰壓薄。

切太陽形，中間唔好切斷，其中一塊要兩倍大。

掃上多一點嘅油，灑上花椒鹽，芫荽碎及芝士。

拎起其中一塊，向中間疊上，跟住疊上其他嗰啲，最大果塊留最後。

疊好，用手幫佢整下個造型。

易潔鑊內掃油，灑上黑芝麻，放入麵團，麵糰面再掃油，灑上黑芝麻。
加蓋，用中小火／細火，煎30－35分鐘。

留意麵糰中間開始乾，而底部又夠脆，就可以反轉。

靚仔呢。
反轉後再煎15－20分鐘左右。

完成後，放涼一點先切。

見到中間一層層中，有芫荽又有芝士。
芫荽煮過後，個味冇生嘅時候咁濃烈，芝士亦已經溶咗。

呢個餅，可以搣開一層層咁食。。。

唔知呢個啱唔啱你口味呢？？？